TULAGALAG

Ang mga ambag para sa TULAGALAG poetry installation ay tatanggapin hanggang bukas.

Pede ito itext [kung maikli] sa 09278313273/ 09322743366.
Kung may kahabaan naman, email sa kilometer64@gmail.com.

Kung installation ready [1ft x 1ft collaboartion ng artwork at poetry, any medium] naman ang ipapasa, maari itong dalhin sa Plaza Miranda sa Konsyerto kontra Con Ass [july 24, 6pm onwards].

Makipag-ugnayan lang saken.

CARIÑO-REVOLUCIONARIO

ni Axel Pinpin

Parang malambot na kutson
sa inaantok kong mata
ang tambak ng natuyong dahon
sa likod-bahay ng magsasakang nasa Kampuhan sa lungsod.
Inaasam na ganito rin ang ating kama
tuwing uuwi ako
sa mahabang pagliban sa mga halik at yakap mo.

Nagkamali ka
noong isipin mong hindi ko na ito hinahanap.
Naaamoy ko ang labi mo
sa bawat pinyang tinatalupan sa baryo.
Sing-init ng kape
kung umagang-walang-almusal
ang yakap mong
may ilang buwan na nang huli kong mahuli
at mabitag sa aking mga bisig.
Mas malimit nang manukso
ang angil at lambing
sa pakikibaka ng masa, hindi pagkagiliw sa iyo,
para magpalukso sa aking puso at dugo.
Mas kapana-panabik
ang umiigting na digma, hindi ang libog,
na abutin ang sukdulan.

Batid kong hindi ka na kayang pangitiin
ng tamis ng salita.
Hindi ka na kikiligin
sa mga tula ng pag-ibig
na itinutugma ko sa paglaya.
Sasabihin mo na namang
sa Bayan na lamang ako makipagtalik.

Oo, hindi ikaw ang una sa buhay ko.
Sana ako’y hindi rin sa ‘yo.

____________________
Mayo 29, 2009
Ika-47 Araw ng Kampuhang Magsasaka Para sa Tunay na Repormang Agraryo
Lungsod ng Quezon

“Binigkas ko sa WordJam! Spoken Word Festival ng CCP na may pamagat na Angal at Atungal, June-24. Sa unang pagkakataon hindi ako umangal at umatungal habang tumutula. Umiibig din ang mga rebolusyunaryo. Matapat na umiibig.”

Usapan (ang Kakaibang Eksenang Normal na sa Kanayunan)

ni dj Raymundo

Sa pagdating
Aking napansin
Kausap si Islaw kalabaw nitong isang Mang Gusting

Isang kumustahan
Ng magkaibigang taon nang magkapiling:

Mang Gusting:
Wag ka sanang datnan agad
Ng gutom at pagal
Kailangang makarami
Para ani’y dumoble

Islaw Kalabaw:
Paumanhin po
Ngunit pagod na ako
Sa maghapong araro
nagsimula alas-singko
at ngayon silipin ang iyong relo
sinasabi’y menus singko
bago mag-alas kuwatro
tanghalian ba’y limot mo?

Mang Gusting:
Hindi ba sapat sayo
Ang tubig at damo
Kaninang miryenda mo
Kasabay nito’y ako
Nginunguya tinapay na kapiraso
At iniinom ang tubig sa may lamat na baso

Islaw Kalabaw:
Sobra naman amo
Kung sapat iyon para sayo
Sa maghapong pagkakayuko
Sa maghapong aking pagararo
Sa maghapon nating trabaho
Konting paghabol ng hinga po
Ang hanap ng katawan ko

Mang Gusting:
Hindi pupuwede tayo’y huminto
Sa ginta ng trabaho
`yan ang pakiusap ko
sapagkat nabaon sa utang
pati dalaga ko’y tau-tauhan
ng among gahaman
sa kita at hatian
laging nakalalamang

Islaw Kalabaw:
Ako’y nahahabag
Sa kalagayang parang bihag
Ngunit ako may `di na kayang sumuwag
Dahil sampung taong walang pitlag
Hila-hila’y ararong kakarag-karag

Mang Gusting:
Unawa ko ang kalagayan mo
Sapagkat taon na rin ating pagsasalo
Ang hindi ko maisip at hindi rin matanto
Kung bakit parang Malabo
Kalagayan ay mabago?
Kaya’t pagtatalo’y ihinto
Magsimula at bumalik sa pagtatarabaho
Panahon kasi ngayo’y `di kalkulado
Baka dumating ang bagyo
Pananim ay delikado:
aning palay `di mababayo
gayundin ang buhay ko

Sa pagalis
Ako’y naiinis
Sa usapang mabilis
na`di umabot ng alas-seis
Itong kamustahan
Ng dalawang magkaibigan
Aking nasaksihan
At nagbigay kamulatan
Sa tunay na kalagayan
Ng magsasaka sa kanayaunan
Problema sa lupang daan taon ng pasan
Tanging solusyon ay kolektibong paglaban
Sa kapiyudalan at pangangamkam
Ng mga naghahariharian.

STATUS MESSAGE

Ni Rustum Casia

 

Pwede bang paminsan minsan,

kahet ngayun lang,

wag muna nateng pag-usapan kung gaano ka katalino,

kung gano kataas ang iyong IQ,

kung sinong matinee idol ka nung 80’s,

kung anung sexual position ka,

kung gaano mo kakilala si ganoon at ganito,

kung gaano ka katunay na lalake.

 

O, kung ano ang suot mong panty,

kung ano ang kinakain mo,

kung saan ka pupunta mamaya,

kung gaano kasakit ang ulo mo,

kung ano ang bibilhin mo pag tumigil na ang ulan,

at kung gaano kabagal ang connection sa iyong pinag-iinternetan.

 

Wag muna natin asikasuhin ang mafia wars.

 

Isang lider magsasaka sa Dumagete ang pinaputukan sa ulo.

Hindi na nakapagpalit ng damit

matapos magbitbit ng anti Chacha na streamer.

 

Katarungan kay Ka Fermin Lorico.

Pwede bang ito ang maging status mo?