Pasay

ni Tine

Sa kalagitnaan
ng maingay at maalikabok na lungsod,
namasdan ko
ang mukha ng demonyo.

Pula ang mata
at gusot ang damit,
humabol, sumabit, kumapit
sa kumakaripas na dyip.

Tinangay ang cellphone
ng mga pasaherong hapis
Nilimas ang kita
ng alila ng langis

Hindi nakapalag
hindi nakalaban
sa tulisang
may kalawanging patalim

sa kabang masaksak
at sa tetano’y unti-unting makitil.

Sa kalagitnaan
ng mga bulok at lumang gusali
namasdan ko ang mukha ng demonyo

Nakapiring na mata
at mamahalin ang damit,
humabol, sumabit, kumapit
sa kumakaripas na dyip

ng mga pamantasang
nagpupumilit mag-increase

Tinangay ang kabuhayan,
dangal at perang inutang,
nilimas ang mga pangarap
ng mga alila ng merkado

Hindi nakapalag,
hindi nakalaban
sa kalawanging patalim
ng tulisang estado

sa mabagal, masalimuot
at madugong pagpaslang
sa kakarampot na karapatan
ng mamamayan.

Sa kalagitnaan
ng hirap, gutom at dusa
namasdan ko
ang mukha ng estado.

*binigkas noong Hunyo 3 sa isang “cultural
protest” sa Kolehiyo ng Pangmadlang Komunikasyon (U.P. Diliman) bilang
pagtutol sa papatinding komersyalisasyon ng edukasyon – sa porma ng
pagtaas ng matrikula at iba’t-ibang bayarin

(Ka)ramdam(an) ang Kaunlaran, SoNA 2008

-Richard Gappi

Bulsa ko ay walang laman
ng kamay ng Malacanang;
butas-butas, walang laman,
Ni pambili ng Alaxan
Sa sakit na kalingkingang
Dama ng buong katawan.
Mas mabuti pa si Pacman
Bugbog-sarado ang yaman.

Eve of Strike

by Dennis Espada

What we must rage now,
find release by tomorrow
is how our yokes dawned.

(Cabuyao, Laguna, October 2004)

Grocery list ni Gloring (o, kung bakit ayoko ng mahinang beer)

-Maureen Gaddi dela Cruz

Buwis na ipinapataw sa 750 ml na bote ng Emperador Brandy: P8.65
 
Bilang ng mga manipulado o dinayang boto sa eleksyon sa Basilan noong 2004 : 3 sa bawat 4 na boto
 
***
Halaga ng nakaw na yaman na inipon ng pamilya Marcos sa Swiss banks, mula 1966 – 1986: $356 million
 
Kabuuang halaga ng NBN-ZTE project: $329.5 million
 
***
Halaga ng “bar-jer” sa “Barger stand” ni Benjamin Abalos sa Wack-wack: P40 kada isa
 
Buwis na ipinapataw sa Ginebra San Miguel bilog: P2.60 sa bawat bote
 
Buwis na ipinapataw sa mga pribado at eksklusibong sementeryo: WALA
 
***
Kabuuang halaga ng CyberEducation project, na iminungkahi kasabay ng NBN-ZTE deal (sa ilalim nito ay magkakaroon daw ng TV sa bawat public school, at magsasagawa ng live satellite broadcasts upang ituro ang mga leksyon): $456 million
 
Bilang ng mga pampublikong paaralan sa buong bansa na walang kuryente: 7,350
 
***
Halaga ng inihaw na pusit sa may kanto ng Recto: P10 kada stick
 
Parusa para sa pagkain sa restawran nang hindi nagbabayad, kung hindi lalagpas ng P200 ang halaga ng kinain : 2-6 na buwang pagkakakulong
 
Halaga ng chocolate buffet sa Manila Peninsula: P500 kada tao
 
Buwis na ipinapataw sa mga regional headquarters ng multinational corporations: WALA
 
***
Kabuuang halaga ng jueteng money na kinamal ng dating pangulong Joseph Ejercito Estrada, ayon sa desisyon ng Sandiganbayan: P4,097,804,173.17
 
Kickback na ipinangako kay Romulo Neri mula sa NBN-ZTE deal: P200 million
 
***
Parusa para sa opisyal ng gobyernong tumanggap o humingi ng suhol: 6-10 taong pagkakakulong at multang katumbas ng hindi bababa sa 3 beses ng halagang isinuhol
 
Parusa para sa biyudang muling nagpakasal bago makalipas ang 301 araw mula sa pagkamatay ng asawa: 1-6 na buwang pagkakakulong at multang hindi lalagpas sa P500
 
Parusa para sa biyudang nagdadalang-tao nang namatayan ng asawa at nagpakasal muli bago makapanganak: 1-6 na buwang pagkakakulong at multang hindi lalagpas sa P500
 
***
Kasalukuyang minimum wage sa Metro Manila, as of June 14, 2008 : P382 bawat araw
 
Halaga ng isaw sa tapat ng Kalayaan Dorm sa UP Diliman: P2 kada stick
 
Halaga ng Philippe Starck-designed salt and pepper shaker set sa isang exclusive home boutique sa Makati: P12,000
 
***
Bilang ng mga biktima ng demolisyon o puwersahang paglilikas sa taong 2007: 10,376
 
Bilang ng mga biktima ng enforced disappearances mula 2001-2007: 185
 
Bilang ng mga biktima ng extrajudicial killings mula 2001-2007: 888
 
***
Halaga ng isang condominium unit sa The Fort: P7-20 million
 
Parusa para sa pagnanakaw ng mga niyog mula sa isang plantasyon o isda mula sa isang fishpond, kung ang ninakaw ay may halagang P50-200: 2 buwan hanggang 2 taon at 4 na buwang pagkakakulong
 
Parusa sa asawang sinaksak ang asawa dahil nahuling nakikipagtalik sa iba: WALA
 
VAT na ipinapataw sa bawat bote ng Red Horse Stallion: P2.05
 
 
…Sinasabi ko na nga ba, kaya ayoko ng mahinang serbesa.

                    

Sources: “Shame of the Nation” occasional papers series of the UP Center for Integrative and Development Studies, Philippine Daily Inquirer and www. inquirer.net, Republic vs. Sandiganbayan (Supreme Court decision – G.R. No. 152154, July 15, 2003), People vs. Estrada (Sandiganbayan decision – Criminal case No. 26558, September 12, 2007), Karapatan 2007 Human Rights Report, Revised Penal Code, National Wages and Productivity Commission website, National Internal Revenue Code