TUPARIN NATIN ANG BANTA NG ATING PANAHON

Music Video produced by ST Exposure and ARREST Gloria! July 2005.

Poetry by Kilometer 64, spoken word by Lourd De Veyra and music by Bobby Balingit. Awarded 2nd Prize in the video animation category of the 2006 Gawad CCP Para sa Alternatibong Pelikula

PAGHAHANDA

Axel Pinpin

Markhan sa mga kalendaryo,
ilagaysa reminder ng telepono,
ikarga sa task ng PDA;
ang walang mga ito–
magbilang nang paatras sa mga daliri.

Tandaan: Mula Hulyo a-kinse
taong dos mil siyete,
buburahin sa lupa ang terorismo!

Kaya’t ang lahat ay maghanda.
Huwag maglakad nang nag-iisa.
Umuwi nang maaga.
Magdala ng anumang pagkakakilanlan.
Magpagupit at mag-ahit.
Magpamanicure at pedicure.
Magpafoot spa at derma.
Ang walang kakayahang gawin ang mga ito–
magsapaniki at gawing araw ang gabi.
Tandaan: Mule Hulyo a kinse
taong dos mil siyete,
lilipulin ang mga kaaway ng batas!

Kaya’t ang lahat ay maghanda.
Iwasang magdalang anumang sumasabog;
granada, atis, abokado,kamote, c4, c2, Gatorade.
Iwasang magdalang anumang pumuputok.
Armalite, M-14, MP-5, mp4,mp3, WMA.
Iwasang magdala ng anumang sumasambulat;
bomba, Bulgar, Toro, Abante, Inquirer.
Ang sadyang hindi gumagamit ng mga ito–
ni huwag magbibiro, ni huwag iimik.
Tandaan: Mula Hulyo a-kinse
taong dos mil siyete,
didisarmahan ang mga bandido!

Kaya’t ang lahat ay maghanda.
Iwasang maging kahina-hinala
dahil ipagbabawal ang paghihinala!
Iwasang maging kaduda duda
dahil ipagbabawal ang pagdududa!
Iwasang maging mareklamo
dahil ipagbabawal ang pagrereklamo!
Ang sadyang makakati ang dila–
basahin ang aking tula
Tandaan: Mula Hulyo a-kinse
taong dos mil siyete,
bibiguin natin ang Batas Kontra Terorismo!

AY NAKU, MUNTIK NA AKONG MAKALIMOT, KASAMANG MARIE AT RUTH-

 ni E. SAN JUAN, Jr.

Habang humihigop ng di-kuno’y malahimalang tubig na bukal sa kanlungan ng Birhen sa Ephesus, pansamantalang natigil kami sa paglalakbay sa Turkiya, nakaligtaan kong kilatisin ang bigat ng pagsusumamo ni Lorena Santos na ilitaw ng rehimeng Arroyo ang kanyang amang dinukot ng ISAFP, si Leo Velasco….

Habang pinanonood ang mga nagsasayaw na dervish sa Konya, pananampalatayang ipinagbawal ni Kema Ataturk upang maisulong ang makabagong bansa, sumingit  ang palaisipan ni Rumi- “Kung ikaw ay kasama ng lahat liban sa akin, wala kang kasama; Kung ikaw ay walang kasama kundi ako lamang, kasama no na ang lahat…”

Walang bisa, patuloy ang pagkawala nina Jonas Burgos, Sherlyn Cadapan, Karen Empeno-
paano ito, Rumi, kahit narito ka, sapilitang pinagwawala pa rin sila?

Nakababad sa alingasngas sa TV sa isang otel sa Izmir tungkol sa halikan nina Richard Gere at isang aktres taga-Indya (kamukha ba ni Rufa?), o sa orgies nina Paris Hilton at Britney Spears, halos nawaglit na sa isip ang pagpaslang kina Diosdado Fortuna, Sotero Llamas, Lizelda Estorba-Cunado, at ilan daang biktima ng terorismo nina Bush-Arroyo….

Ay naku, muntik ko nang malimot sina Alice Claver, Juvy Magsino at Leima Fortuna dahil pinagkakaguluhan ng petiburgis sa Ankara ang Harry Potter & the Deathly Hallows at mga huling pakulo ni O.J. Simpson sa If I Did It…. Maramdamin ba o tiyak na karamdaman?

At sa Antalya naman, kasiping sina Britney Spears at Catherine Zeta-Jones at dyugyugan ng mga belly-dancer kaindayog ng makiring alon ng dagat Mediteranyo,  tuluyang napalis sa isip ang sakrispisyo nina Cathy Alcantara, Audie Lucro at ilan pang susunod–mga bangkay na walang pangalan kundi sa pagsisikap ng KARAPATAN….

At sa lilim ng moskeng asul sa Istanbul, malayo na sa mga mosaic ng mga santo’t anghel sa kubling yungib sa Cappadocia, sinubok kong baguhin ang bugtong ni Rumi: Kung kasama mo si Mario Auxilio o si Eden Marcellana, wala nang iba pa, kasama mo na sa tabi mo ang sambayanang humahatol at dumudurog sa pasistang Estado…

Kahit na isang taong pinagmalupitan, tulad ni Lourdes Rubrico, kahit nagayuma ka ng ngiting malagkit ng dalawang Medusa sa haliging marmol ng cistern ng Hagia Sophia,  lagi kang gagambalain ng gunitang umaantak, tigib ng hirap at pighating tiniis at titiisin-lagi kang pupukawin ng mga inulila saan ka man maglagalag, sa guhong imperyo ng Romano o ng Ottoman, ng Britanya o Pransiya-Ozymandias, igala mo ang paningin-

o saanmang sulok ng imperyo ng kapital ng USA, tutugisin ka ng mga ahas na buhok ng diwatang umaapaw sa biyaya ng kalikasang walang pag-iimbot at kasakiman, walang pagmamalabis, armadong diwata ng katarungan at ng bayang naghihimaksik…

At Kung Sakaling Bangkay Akong Haharap Sa’yo!

Rey Tamayo, Jr.

Bawat letra at titik inihahandog sa’yo,
Upang iyong mabatid ang mga punglo’t bangkay;
Na nagdusa ng pait kapalit ang prinsipyo.
Kalauna’y pinatid; peryodista’y hinimlay-
Sa puntod ng tigatig bayani silang tunay,
Sa lapida’y may ukit alaalang totoo.

Inidolo ang akdang mabangis na totoo,
Tarikan na salita ay laan para sa’yo.
Mailigtas ang madla at maralitang tunay;
Laban sa lason, sumpa at kamandag ng bangkay.
Nitong mga banyagang hangad silang ihimlay,
Dahil kan’lang giniba ang bulaang prinsipyo.

Dugo ba ang katumbas nitong aming prinsipyo?
Hangad lamang ilabas ang balitang totoo,
Bulag na ba ang batas at waring nakahimlay?
Ang pluma’y inuutas na dahil lamang sa’yo-
At kami’y dinadahas. binibilang ang bangkay,
Mula sa mga ahas maninikil na tunay.

Bakas nila’y sinundan waring aninong tunay,
Kahapon lamang tambal matatag na prinsipyo;

Ngayo’y may alingawngaw mga banta ng bangkay.
At nang ako’y sumigaw sumulat ng totoo,
Karaka’y binusalan ang panulat ko sa’yo;
Tinta’t pluma’y binuwal ang diwa’y nakahimlay.

At ngayo’y binilanggo sa karsel inihimlay,
Sinugatan ang pusong may tanikalang tunay.
O yaring pagkahapo’y dili ba’t galing sa’yo?
Ibig ipagkanolo ang doktrina’t prinsipyo,
Pero nasa kamao ang dangal ng tooo;
Upang ang pagkatao’y di maging isang bangkay.

Sa kabilang piitan minasdan itong bangkay,
Sa dakong may guwang muling may ihihimlay;
Hindi lang walo, siyam ang nasawing tooo.
Di ko na rin mabilang ang trinaydor na tunay,
Unti-unting tinanggal pagkatao’t prinsipyo;
Ngunit di mapapaslang pagtitiwala Sa’yo.

At kung sakaling bangkay akong haharap sa’yo-
H’wag mo sanang ihimlay adhikaing totoo,
Ang peryodistang tunay may akdang maprinsipyo.