THIRD YEAR ANNIVERSARY.

Third Year Anniversary ng KM64

Conspiracy Bar and Gardens, Visayas Avenue, Quezon City

March 14, 2006 6 pm to 9 pm

Alex Remollino, Richard Gappi, Omeng Rodriguez, Rustum Casia, Mari Santiago, Gelacio Guillermo, Lei Garcia, Mark Angeles, Egay Samar, Allan Popa, Babes Alejo, Len Olea, Ayan Dela Cruz, Boyet de Mesa, Kapi Capistrano, Noel Barcelona, Dennis Espada, Abet Umil, Bobby Balingit

Tambisan sa Sining, Earthfishfish, CEGP, Musicians4Peace, SiningBugkos, Anino Shadowplay Collective

Happy Anib.

MGA DAGA SA DIBDIB (NI GMA)

Mga Daga sa Dibdib (ni GMA)
Kristoffer Berse, 030706

Mag-aanim na taon ka nang
Hindi mapalagay: Ligalig ang hatid
Ng aming mumunting mga yabag
Sa dibdib ng iyong malay.
Nginangatngat ka ng takot
Na anumang oras, maaari naming
Tangayin palabas ng Palasyo
Ang iyong mga pangarap.

Salot ang iyong turing
Sa kagaya naming maliliit
Dahil malaya kaming nakakapaglabas-
Pasok sa butas ng mga batas
Na pinagkukublihan ng iyong mga balak.
Kinatatakutan mong sa dilim
Mahuhuli namin ang kaluskos
Ng iyong mga luho at lihim.

Kaya hindi na namin ikinabigla
Nang magpasya kang lasunin
Pang lalo ang aming mga bituka:
E-VAT sa bawat kakarampot
Na latak, mumo at siming naaabot
Ng aming nguso at palad.
At upang kami ay tuluyang
Manghina’t panghinaan ng loob,

Naglatag ka ng bitag
Upang masilo ang aming lakas
At tapang: “Sedisyon sa sinumang
Pangahas na maglalayong halughugin
Ang baho ng Malakanyang!”
Kagyat mong ipinagbawal
Sa EDSA, Ayala at Mendiola
Maging ang aming mga anino

At binansagan kaming “kalaban
Ng estado.” Iniisip mo marahil
Na sa harap ng mga pusang nakatubog
Sa tingga ang pangil at kuko,
Magpupulasan kami ng takbo
Palayo sa alingasaw ng Palasyo;
Ngunit hindi nababahag
Ang aming buntot, at bagama’t

Hindi namin nasang maghasik
Ng rimarim sa lababo ng lungsod,
Huwag mong asahang kami
Ay magmumukmok na lamang
Sa aming mga lungga,
Gayong nagkalat ang mga butil
Ng poot, ganid at dahas
Sa paminggalan ng iyong pamamahala.

STATE OF EMERGENCY

State of Emergency

Lolito R. Go Jr.

Ayon sa intelihensya ng kaharian:

Umabot hanggang palasyo ang usok ng

Nilulutong kudeta

May lahok ng alak na implamable

Puso ng dagambukid

Dugo ng asong-kalye

Kamandag ng serpiyente

Ipakakain sa reyna

Ang nakalalasong putahe

Ayon sa intelihensya ng kaharian:

Umabot sa palasyo ang pakakak ng

iresponsableng pamamahayag

Badya ng paghuhukom

Nakabubulabog

Nakabibingi

Nakaririndi ang alingawngaw

Ipanghaharana sa reyna

Ang makapunit-taingang ingay

Ayon sa intelihensya ng kaharian:

Umabot sa palasyo ang pinalipad na

Eroplanong papel

Ng desperadong mamamayan

Lulan ang mga titik

ng paninisi’t pagbibintang

Sakay ang antraks ng benggansa

Ipasisinghot sa reyna

Hanggang malusaw ang mga baga

Umabot sa palasyo ang dagitab ng silakbo

Ang balaraw ng naipong panaghoy

Na sumisilahis mula sa maitim na papawirin

Na nagtatangka ng panibagong unos

Hindi pa man humuhupa ang alimuom ng

Nagdaang ambon

May karapatang mataranta ang lahat sa palasyo

At ipakandado ang bibig ng katotohanang lason

Ayon sa intelihensya ng kahariang nauulol

GLORIA

Gloria

-Rustum Casia

Oo, napanaginipan kita kagabi.
Lagi kitang napapanaginipan, pagkat lagi kitang iniisip.
Di ba sabi nga, kung sino o ano yung iniisip mo bago ka mahimbing,
yun ang mapapanaginipan mo?
E, ikaw ang iniisip ko.
Minsan nga kahit gising, nananaginip ako.
Gising o tulog, ikaw ang iniisip ko.

Tulad ngayon.

Kinakayod ko ng tinidor ang iyong ngalangala.
Ginugupit ko ang iyong tainga.
Dinudukot ko ng kutsarita ang kaliwa mong mata.
Binubunot ko ang mga kuko mo sa kaliwa mong paa.
Pinapasakan ko ang iyong ilong ng dinurog na paminta.
Kinakalbo ko ang iyong mga pilik mata.
Ipinapakain din kita ngayon sa patay gutom na buwaya.
Isinasakay kita sa rocketship na pasasabugin pag nasa ibang planeta
na.

Minsan masarap kang isipin.
Parang ang cute cute mong lunurin.
Ang cute mong lunurin sa estero de San Miguel.
Para bang ikaw ang pinaka cute na laruan na ilulublob ko sa burak at
tubigan.
Ayan tuloy, kinikilig na naman ako.
I always feel this way pag pumapasok ka sa isip ko.
Kumikislap ang paligid ko,
parang puro stars at rainbow.
Naeexcite na naman ako over the fact na pwede kong gawin anuman ang
gusto ko sa iyo.

Sana pag natulog ako at paggising ko katabi kita sa kama.
Tapos, tatakpan ko ang iyong mukha ng unan.
Tapos, susuntukin ko ng combo ang iyong tyan.

Ito na lang ata ang gusto kong gawin.
Isipin ka, isipin ka, isipin ka.

Lalo ngayong ang cute cute mo na naman sa aking paningin.

Ay nako Gloria,
tumatalim na naman ang aking ngipin.